महाराष्ट्र (मुंबई)दारूबंदी अधिनियम १९४९
कलम १४८
रद्द करणे व सुधारणे :
१) अनुसूची १ मध्ये निर्दिष्ट केलेले अधिनियम हे सदर अनुसूचीच्या चौथ्या स्तंभात विनिर्दिष्ट केलेल्या मर्यादेपर्यंत या अन्वये रद्द करण्यात आले आहेत आणि अनुसूची २ मध्ये विनिर्दिष्ट केलेल्या अधिनियमात त्या अनुसूचीच्या चौथ्या स्तंभात विनिर्दिष्ट केलेल्या मर्यादेपर्यंत या अन्वये सुधारणा करण्यात आल्या आहेत.
२) परंतु या अधिनियमातील कोणतीही तरतूद किंवा ह्या अधिनियमातील कोणतीही तरतूद किंवा ह्या अधिनियमान्वये जो कोणताही अधिनियम किंवा तरतूद रद्द करण्यात किंवा सुधारण्यात आली असेल त्यामुळे :
एक) हा अधिनियम अमलात येण्यापूर्वी संपादन केलेला किंवा प्राप्त झालेला कोणताही हक्क किंवा स्वामित्व अथवा प्राप्त झालेले किंवा पत्करलेले कोणतेही बंधन किंवा दायित्व यांस बाध येणार नाही किंवा बांध येतो असे समजण्यात येणार नाही.
दोन) अशा हक्काच्या, स्वामित्वाच्या, हितसंबंधाच्या, बंधनाच्या किंवा दायित्वाच्या संबंधातील कोणत्याही कायदेशीर कारवाईस किंवा इलाजास अथवा हा अधिनियम अमलात येण्यापूर्वी केलेल्या किंवा करून दिलेल्या कोणत्याही गोष्टीस बाध येणार नाही किंवा बाध येतो असे समजण्यात येणार नाही आणि हा अधिनियम जणू संमत करण्यात आला नव्हता असे समजून कोणतीही अशी कारवाई पुढे चालविण्यात येईल व त्याप्रमाणे ती निकालात काढण्यात येईल.
तीन) मुंबई अबकारी अधिनियम, १८७८, कलम २९-अ अन्वये कोणतीही शुल्के बसविण्यात आणि या अन्वये रद्द करण्यात आलेल्या अधिनियमाच्या कोणत्याही इतर तरतुदींअन्वये बसवावयाची कोणतीही शुल्के किंवा फी यांच्या वसुलीस बाध येणार नाही किंवा बाध येतो असे समजण्यात येणार नाही आणि हा अधिनियम जणू संमत करण्यात आला नव्हता असे समजून अशी शुल्के किंवा फीच्या रकमा, यथास्थिती, बसविण्यात किंवा वसुल करण्यात येतील.
३) प्रस्तुत अधिनियमान्वये निरसित करण्यात आलेल्या अधिनियमांपैकी कोणत्याही अधिनियमान्वये केलेली कोणतीही नोटीस, काढलेली कोणतीही अधिसूचना अथवा केलेली कोणतीही नेमणूक, काढलेली कोणतीही अधिसूचना अथवा दिलेली कोणतीही नोटीस किंवा आदेश, केलेला नियम किंवा नमुना, ही प्रस्तुत अधिनियमाच्या तरतुदीशी विसंगत नसतील तेथवर अमलात असण्याचे चालू राहील आणि ती प्रस्तुत अधिनियमाच्या तरतुदीअन्वये करण्यात, काढण्यात किंवा देण्यात आली आहेत असे समजले पाहिजे आणि या अधिनियमान्वये दिलेली, अशी काढलेली किंवा दिलेली कोणतीही नेमणूक, अधिसूचना, नोटीस, आदेश, नियम किंवा ही प्रस्तुत अधिनियमान्वये अधिक्रमित करण्यात आली नसतील तर व अधिक्रमित करण्यात येईपर्यंत तशीच अमलात असण्याचे चालू राहील. मग अशी अधिसूचना, नोटीस, आदेश नियम किंवा नमुना करण्यास, काढण्यास किंवा देण्यास सक्षम असलेला प्राधिकारी निरसित केलेल्या अधिनियमान्वये प्राधिकृत केलेल्या प्राधिकाऱ्याहून भिन्न असला तरीसुद्धा हरकत असणार नाही. तसेच अशी अधिसूचना, नोटीस, आदेश, नियम किंवा नमुना ही भिन्न नमुन्याप्रमाणे किंवा भिन्न नावाने करण्यात, काढण्यात किंवा देण्यात आली असली तरीही हरकत असणार नाही.
४) ह्या अधिनियमान्वये रद्द करण्यात आलेल्या अधिनियमांपैकी कोणत्याही अधिनियमान्वये दिलेले अनुज्ञप्ती, परवाना, पास, प्राधिकारपत्र किंवा परवानगी अमलात असण्याचे चालू राहील आणि ती ह्या अधिनियमाच्या तत्सम तरतुदीअन्वये देण्यात आली आहेत असे समजण्यात येईल.
INSTALL Android APP
*टिप :या वेबसाईट वरील कंटेंट किंवा माहिती ही केवळ शिक्षण किंवा ऐज्यूकेशनल वापरासाठी आहे, तरी याचा कुठेही कायदेशीर कारवाई करीता वापर करु नये तसेच या मध्ये काही चुका आढळल्यास त्यासाठी प्रकाशक किंवा वेबसाईट चे मालक जबाबदार असणार नाहीत, चुका निदर्शनास आणून दिल्यास सुधारण्याचा प्रयत्न केला जाईल.