स्त्रियांचे असभ्य प्रतिरूपण (प्रतिषेध) अधिनियम १९८६
कलम ५ :
प्रवेश करण्याची व झडती घेण्याची सक्ती :
(१) विहित करण्यात येतील अशा नियमांच्या अधीनतेने राज्य शासनाने प्राधिकृत केलेला कोणताही राजपत्रित अधिकारी हा ज्या क्षेत्रासाठी त्याला प्राधिकृत केले असेल त्या क्षेत्राच्या स्थानिक मर्यादेत, -
(क) त्याला आवश्यक वाटत असेल असे कोणतेही साहाय्य घेऊन, ज्या जागेत या अधिनियमाखालील अपराध घडला असेल किंवा घडत आहे असे त्यास सकारण वाटत असेल, अशा कोणत्याही जागेत सर्व वाजवी वेळांमध्ये प्रवेश करील व झडती घेईल.
(ख) अशी कोणतीही जाहिरात किंवा कोणतेही पुस्तक, पत्रक, पत्रिका, सरकचित्र, चित्रफीत, लेख, चित्र, रंगचित्र, छायाचित्र, प्रतिरूपण किंवा आकृती ही, या अधिनियमातील कोणत्याही उपबंधांचे उल्लंघन करीत आहे, असे त्यास सकारण वाटत असेल तर तो ती जप्त करील.
(ग) खंड (क) यामध्ये नमूद केलेल्या कोणत्याही जागेत सापडलेल्या कोणत्याही अभिलेखाची, नोंदवहीची, दस्तऐवजाची किंवा इतर कोणत्याही महत्त्वाच्या वस्तूची तपासणी करील व ती या अधिनियमाखालील शिक्षापात्र अपराध केल्याचा पुरावा ठरू शकेल असे जर त्यास सकारण वाटत असेल तर तो ती वस्तू जप्त करील :
परंतु, या पोटकलमान्वये खाजगी राहत्या घरात वॉरंटाशिवाय प्रवेश करता येणार नाही :
आणखी असे की, या कलमाखालील जप्तींच्या शक्तींचा वापर, कोणत्याही दस्तऐवजाची, लेखाची किंवा वस्तूची एकरूपता, उपयुक्तता किंवा विक्रीयोग्य मूल्य यावर परिणाम न होता, अशा दस्तऐवजावरील, लेखावरील किंवा वस्तूवरील जाहिरात ती उमटरेखित केल्याच्या किंवा अन्य कारणांमुळे, वेगळी करणे शक्य नसेल तर, अशी कोणतीही जाहिरात अंतर्भूत असलेल्या त्या दस्तऐवजाच्या, लेखाच्या, वस्तूच्या संबंधात तसेच त्यात कोणताही मजकूर असल्यास, त्याच्याही संबंधात करता येईल.
(२) फौजदारी प्रक्रिया संहिता, १९७३ (१९७४ चा २) यांचे उपबंध हे, उक्त संहितेच्या कलम ९४ खाली काढण्यात आलेल्या वॉरंटाच्या प्राधिकारान्वये घेतलेल्या कोणत्याही झडतीस व जप्तीस जसे लागू होतात तसेच ते, शक्य होईल तेथवर, या अधिनियमाखाली करण्यास येणाऱ्या झडतीस व जप्तीस लागू करण्यात येतील.
(३) कोणतीही व्यक्ती, तिने पोटकलम (१) चे खंड (ख) व (ग) खाली कोणतीही वस्तू जप्त केली असेल त्याबाबतीत, शक्य तितक्या लवकर, जवळच्या दंडाधिकाऱ्यास कळवील आणि त्या वस्तूच्या अभिरक्षेबाबत त्याचे आदेश घेईल.
INSTALL Android APP
*टिप :या वेबसाईट वरील कंटेंट किंवा माहिती ही केवळ शिक्षण किंवा ऐज्यूकेशनल वापरासाठी आहे, तरी याचा कुठेही कायदेशीर कारवाई करीता वापर करु नये तसेच या मध्ये काही चुका आढळल्यास त्यासाठी प्रकाशक किंवा वेबसाईट चे मालक जबाबदार असणार नाहीत, चुका निदर्शनास आणून दिल्यास सुधारण्याचा प्रयत्न केला जाईल.