महाराष्ट्र प्राणिरक्षण अधिनियम १९७६
कलम ६ :
अनुसूचित प्राण्यांच्या कत्तलीवरील निर्बंध :
(१) त्यावेळी अमलात असलेल्या कोणत्याही कायद्यामध्ये काहीही अंतर्भूत असले तरी किंवा एतद्विरूद्ध कोणताही परिपाठ किंवा रूढी असली तरी, कोणतीही व्यक्ती, तिने कोणत्याही अनुसूचित प्राण्याच्या बाबतीत तो प्राणी कत्तलीस योग्य असल्याबद्दल सक्षम प्राधिकरणाकडून लेखी प्रमाणपत्र मिळवलेले असल्याखेरीज, महाराष्ट्र राज्यातील कोणत्याही ठिकाणी अशा प्राण्याची कत्तल करणार नाही किंवा कत्तल करविणार नाही.
(२) सक्षम प्राधिकरणाच्या मते, -
(क) अनुसूचित प्राणी - मग तो नर असो किंवा मादी असो - ओझी वाहण्याच्या प्रयोजनासाठी, किंवा कोणत्याही प्रकारच्या शेतीकामासाठी किफायतशीर असेल किंवा किफायतशीर होण्याची शक्यता असेल;
(ख) अनुसूचित प्राणी, नर असेल तर, पैदाशीच्या प्रयोजनासाठी किफायतशीर असेल किंवा किफायतशीर होण्याची शक्यता असेल;
(ग) अनुसूचित प्राणी, जर मादी असेल तर, दूध देण्याच्या किंवा गाभण राहण्याच्या प्रयोजनासाठी किफायतशीर असेल किंवा किफायतशीर होण्याची शक्यता असेल; तर पोटकलम (१) अन्वये असे कोणतेही प्रमाणपत्र देण्यात येणार नाही.
(३) राज्य शासनास, सक्षम प्राधिकरणाच्या, या कलमाखालील कोणतेही प्रमाणपत्र देण्याचे नाकारणाऱ्या कोणत्याही आदेशामुळे व्यथित झालेल्या कोणत्याही व्यक्तीकडून असा आदेश मिळाल्याच्या दिनांकापासून साठ दिवसांच्या आत अर्ज आल्यावर किंवा कोणत्याही वेळी स्वाधिकारे, या कलमाखालील सक्षम प्राधिकरणाच्या आदेशाच्या कायदेशीरपणाबद्दल किंवा योग्यतेबद्दल स्वत:ची खात्री करून घेण्यासाठी, कोणत्याही वेळी, त्या प्रकरणाचा अभिलेख मागविता येईल व त्याची तपासणी करता येईल आणि त्या संदर्भात, त्यास योग्य वाटेल असा आदेश देता येईल.
(४) या कलमाखालील प्रमाणपत्र हे, विहित करण्यात येईल अशा नमुन्यात व अशी फी दिल्यानंतर देण्यात येईल.
(५) पोटकलम (३) च्या तरतुदींस अधीन राहून, सक्षम प्राधिकरणाने प्रमाणपत्र देणारा किंवा ते देण्याचे नाकारणारा जो कोणताही आदेश दिला असेल तो आदेश आणि पाटकलम (३) खाली राज्य शासनाने दिला असेल असा कोणताही आदेश अंतिम असेल आणि त्यावर कोणत्याही न्यायालयात प्रश्नास्पद करता येणार नाही.
INSTALL Android APP
*टिप :या वेबसाईट वरील कंटेंट किंवा माहिती ही केवळ शिक्षण किंवा ऐज्यूकेशनल वापरासाठी आहे, तरी याचा कुठेही कायदेशीर कारवाई करीता वापर करु नये तसेच या मध्ये काही चुका आढळल्यास त्यासाठी प्रकाशक किंवा वेबसाईट चे मालक जबाबदार असणार नाहीत, चुका निदर्शनास आणून दिल्यास सुधारण्याचा प्रयत्न केला जाईल.