महाराष्ट्र भीक मागण्यास प्रतिबंध करण्याबाबत अधिनियम १९५९
कलम २६ :
महारोगी व वेडे यांची वैद्यकीय तपासणी व त्यांस अटकावून ठेवणे :
(१) न्यायालयाच्या कोणत्याही आदेशान्वये प्रमाणित संस्थेत अटकावून ठेवलेला कोणताही भिकारी विकृतचित्त किंवा महारोगी आहे असे राज्य शासनास वाटेल तेव्हा, राज्य शासनास, असा भिकारी विकृतचित्त किंवा महारोगी आहे असे त्यास वाटण्याची कारणे आदेशात नमूद करून, अशा व्यक्तीस वेड्यांच्या इस्पितळांत किंवा कुष्ठालयांत किंवा इतर सुरक्षित ठिकाणी हलविण्याबाबत आदेश देण्याचा अधिकार आहे. अशा भिकाऱ्यास, राज्य शासन निदेश देईल त्याप्रमाणे, त्यास ज्या मुदतीपर्यंत अटकावून ठेवण्याचा आदेश दिलेला असेल त्या मुदतीच्या उरलेल्या काळात किंवा ती मुदत संपल्यावर वैद्यकीय अधिकाऱ्याने असे प्रमाणित केले की भिकाऱ्याच्या किंवा इतरांच्या सुरक्षिततेच्या दृष्टीने त्यास वैद्यकीय व्यवस्थेखाली किंवा उपचाराखाली आणखी अटकावून ठेवणे आवश्यक आहे तर, विधी अन्वये मुक्त करण्यात येईपर्यंत त्यास त्या ठिकाणी ठेवले पाहिजे व त्याच्यावर उपचार केले पाहिजेत.
(२) राज्य शासनास जेव्हा असे वाटेल की, भिकारी विकृतचित्त असण्याचे बंद झाले आहे किंवा तो महारोगापासून बरा झाला आहे तेव्हा राज्य शासनाने ज्या व्यक्तीच्या ताब्यात भिकारी असेल त्या व्यक्तीस आदेशाद्वारे निदेश देऊन, जर भिकारी अजूनही अभिरक्षेत ठेवला जाण्यास पात्र असेल तर, भिकाऱ्याला ज्या प्रमाणित संस्थेमधून हलविण्यात आले असेल त्या प्रमाणित संस्थेमध्ये पाठविले पाहिजे किवा भिकारी त्यापुढे अभिरक्षेत ठेवला जाण्यास पात्र नसेल तर, त्यास मुक्त करण्याचा आदेश दिला पाहिजे.
(३) पोटकलम (१) अन्वये वेड्याच्या इस्पितळांत किंवा कुष्ठालयांत ठेवलेल्या प्रत्येक भिकाऱ्यास, ज्या मुदतीपर्यंत त्यास अटकावून ठेवण्याचा आदेश देण्यात आला असेल ती मुदत संपल्यानंतर, भारताचा वेड लागलेल्या इसमांबाबत अधिनियम, १९१२ कलम ३१ याचे उपबंध किंवा पोटकलम (२) च्या उपबंधांस अधीन राहून महारोग्यांबाबत अधिनियम, १८९८, कलम १४ याचे उपबंध लागू होतील आणि एखाद्या भिकाऱ्यास त्या पोटकलमान्वये ज्या मुदतीत वेड्यांच्या इस्पितळांत किंवा कुष्ठालयांत ठेवण्यात आले असेल ती मुदत न्यायालयाने त्यास ज्या मुदतीपर्यंत अटकावून ठेवण्याचा आदेश दिला असेल त्या मुदतीचा भाग म्हणून मोजली पाहिजे :
परंतु, एखाद्या भिकाऱ्यास त्याच्या विकृतचित्तामुळे किंवा महारोगामुळे ताबडतोब हलविणे आवश्यक असेल तेव्हा, त्या गोष्टींबाबत राज्य शासनाचे आदेश मिळविण्यात येतील त्या मुदतीपर्यंत, भिकाऱ्यास वेड्यांच्या इस्पितळाच्या किंवा कुष्ठालयाच्या स्वीधीन करण्याकरिता ताबडतोब आदेश मिळविण्यासाठी ज्या संस्थेत भिकाऱ्यास अटकावून ठेवण्यात आलेले असेल त्या संस्थेच्या प्राधिकाऱ्यास, भारताचा वेड लागलेल्या इसमाबाबत अधिनियम, १९१२ अन्वये किंवा महारोग्यांबाबत अधिनियम, १८९८ अन्वये क्षेत्राधिकार असलेल्या न्यायालयाकडे अर्ज करता येईल.
INSTALL Android APP
*टिप :या वेबसाईट वरील कंटेंट किंवा माहिती ही केवळ शिक्षण किंवा ऐज्यूकेशनल वापरासाठी आहे, तरी याचा कुठेही कायदेशीर कारवाई करीता वापर करु नये तसेच या मध्ये काही चुका आढळल्यास त्यासाठी प्रकाशक किंवा वेबसाईट चे मालक जबाबदार असणार नाहीत, चुका निदर्शनास आणून दिल्यास सुधारण्याचा प्रयत्न केला जाईल.