कलम ६६ : भांगेची बेकायदेशीररीत्या लागवड करणे व ती गोळा..
महाराष्ट्र (मुंबई)दारूबंदी अधिनियम १९४९
कलम ६६
भांगेची बेकायदेशीररीत्या लागवड करणे व ती गोळा करणे आणि इतर गोष्टींबद्दल शिक्षा :
१) जी कोणी व्यक्ती ह्या अधिनियमाच्या तरतुदींचे किंवा तदन्वये केलेल्या कोणत्याही नियमाचे किंवा विनियमाचे किंवा तदन्वये दिलेल्या कोणत्याही आदेशाचे अथवा तदन्वये दिलेल्या कोणत्याही लायसन्सचे, परवान्याचे पासाचे किंवा प्राधिकारपत्राचे उल्लंघन करून;
अ) सन १९६० चा मुंबई अधिनियम क्रमांक २२, कलम ५० (अ) १) अन्वये खंड (अ) वगळ्यात आला.
ब) कोणतेही मादक द्रव्य (अफूव्यतिरिक्त) किंवा भांग (सेवन करील किंवा विहित केलेल्या मर्यादेपेक्षा कमी किंवा मर्यादेपर्यंत प्रमाणात जवळ बाळगील किंवा वापरील)
क) कोणतेही ताडी देणारे झाड छेदील किंवा छेदण्यास परवानगी देईल,
ड) कोणत्याही झाडापासून ताडी काढील किंवा ताडी काढण्यास परवानगी देईल, त्यास सिद्धापराध ठरविण्यात आले असता;
एक) जर तो अपराध पूर्णत: दारुबंदी असलेल्या क्षेत्राखेरीज इतर क्षेत्रात केलेला असेल तर, -
अ) पहिल्या अपराधाबद्दल सहा महिन्यापर्यंत वाढविता येईल इतक्या मुदतीच्या कारावासाची किंवा दहा हजार रुपयांपर्यंत वाढविता येईल इतक्या द्रव्यदंडाची शिक्षा होईल :
परंतु, न्यायालयाच्या निकालपत्रात तद्विरुद्ध नमूद करण्यात येतील अशा विशेष व पुरेशा कारणांच्या अभावी अशी कारावासाची शिक्षा तीन महिन्यांपेक्षा कमी असणार नाही व असा द्रव्यदंड पाच हजार रुपयांपेक्षा कमी असणार नाही;
ब) दुसऱ्या अपराधाबद्दल, दोन वर्षापर्यंत वाढविता येईल इतक्या मुदतीच्या कारावासाची किंवा वीस हजार रुपयांपर्यंत वाढविता येईल इतक्या द्रव्यदंडाची, शिक्षा होईल :
परंतु, न्यायालयाच्या निकालपत्रात तद्विरुद्ध नमूद करण्यात येतील अशा विशेष व पुरेशा कारणांच्या अभावी अशी कारावासाची शिक्षा सहा महिन्यांपेक्षा कमी असणार नाही व असा द्रव्यदंड दहा हजार रुपयांपेक्षा कमी असणार नाही;
क) तिसऱ्या किंवा त्यानंतरच्या अपराधाबद्दल दोन वर्षापर्यंत वाढविता येईल इतक्या मुदतीच्या कारावासाची किंवा वीस हजार रुपयांपर्यंत वाढविता येईल इतक्या रकमेच्या द्रव्यदंडाची, शिक्षा होईल :
परंतु, न्यायालयाच्या निकालपत्रात तद्विरुद्ध नमूद करण्यात येतील अशा विशेष व पुरेशा कारणांच्या अभावी अशी कारावासाची शिक्षा नऊ महिन्यांपेक्षा कमी असणार नाही व असा द्रव्यदंड दहा हजार रुपयांपेक्षा कमी असणार नाही;
दोन) पुर्णत: दारुबंदी असलेल्या क्षेत्रात जर तो अपराध केलेला असेल तर, -
अ) पहिल्या अपराधाबद्दल, सहा महिन्यापर्यंत वाढविता येईल इतक्या मुदतीच्या कारावासाची किंवा दहा हजार रुपयांपर्यंत वाढविता येईल इतक्या रकमेच्या किंवा जप्त केलेल्या दारुच्या किंमतीच्या दुप्पट इतक्या रकमेच्या, यापैकी जी अधिक असेल इतक्या रकमेच्या द्रव्यदंडाची, शिक्षा होईल;
ब) दुसऱ्या अपराधाबद्दल, दोन वर्षापर्यंत वाढविता येईल इतक्या मुदतीच्या कारावासाची किंवा, वीस हजार रुपयांपर्यंत वाढविता येईल इतक्या रकमेच्या किंवा जप्त केलेल्या दारुच्या किंमतीच्या तिप्पट इतक्या रकमेच्या, यापैकी जी अधिक असेल इतक्या रकमेच्या द्रव्यदंडाची, शिक्षा होईल;
क) तिसऱ्या किंवा त्यानंतरच्या अपराधाबद्दल दोन वर्षापर्यंत वाढविता येईल इतक्या मुदतीच्या कारावासाची, किंवा वीस हजार रुपयांपर्यंत वाढविता येईल इतक्या रकमेच्या किंवा जप्त केलेल्या दारुच्या किंमतीच्या चारपट इतक्या रकमेच्या, यापैकी जी अधिक असेल इतक्या रकमेच्या द्रव्यदंडाची, शिक्षा होईल.
२) पोट-कलम (३) च्या तरतुदीस अधीन राहून, मादक द्रव्य सेवन केल्यामुळे पोट-कलम (१) चा खंड (ब) खालील अपराधाबद्दल असलेल्या कोणत्याही न्यायचौकशीत आरोपी व्यक्तीने दारूचे सेवन केले आहे. असा आरोप करण्यात आला असेल आणि आरोपी व्यक्तीच्या रक्तातील मद्यार्कांचे प्रमाण आकारमानातील वजनाने ०.०५ टक्क्यांहून कमी नाही असे सिद्ध करण्यात आले असल्यास, सेवन केलेली दारू औषधीसाठी किंवा प्रसाधनासाठी तयार केलेला पदार्थ किंवा जंतुनाशक पदार्थ किंवा द्रावण किंवा मद्यार्क असलेला सुंगधी अर्क किंवा सरबत होते आणि अशा दारूचे सेवन या अधिनियमाचे किंवा त्या अन्वये केलेले कोणतेही नियम, विनियम किंवा आदेश यांचे उल्लंघन करून करण्यात आले नव्हते हे सिद्ध करण्याचा बोजा आरोपी व्यक्तीवर असेल आणि न्यायालयाने अशा पुराव्याच्या अभावी तद्विरूद्ध अनुमान काढले पाहिजे.
३) पोट-कलम (२) याच्या तरतुदी :
अ) शासनाने किंवा स्थानिक प्राधिकरणाने चालविलेल्या किंवा त्यांच्या साहाय्याने चालविण्यात येणाऱ्या किंवा धर्मार्थ असलेल्या कोणत्याही रूग्णालयात, आरोग्य सुधारणागृहात शुश्रूषागृहात किंवा दवाखान्यात दाखल करून घेतलेल्या रोग्यांवर उपचार चालू असलेल्या मुदतीत त्यांना देण्यात येणाऱ्या मद्यार्काच्या बाबतीत, किंवा
ब) विहित करण्यात येईल अशा इतर संस्थेत किंवा अशा परिस्थितीत अशा इतर व्यक्तींना, कोणतीही दारू घेण्यास लागू असणार नाही.
--------
२०१९ सुधारणे पुर्वी :
एक) पहिल्या अपराधाबद्दल सहा महिन्यांपर्यंत असू शकेल इतक्या मुदतीच्या कैदेची शिक्षा होईल व (दहा हजार रूपयांपर्यंत) असू शकेल इतक्या दंडाची शिक्षा होईल.
परंतु न्यायालयाच्या निकालपत्रात नमूद करावयाच्या तद्विरूद्ध विशेष व पुरेशा कारणांच्या अभावी, अशी कैदेची शिक्षा तीन महिन्यांपेक्षा कमी असता कामा नये व दंड (पाच हजार रूपयांपेक्षा) कमी असता कामा नये :
दोन) दुसऱ्या अपराधाबद्दल दोन वर्षांपर्यंत असू शकेल इतक्या मुदतीच्या कैदेची शिक्षा होईल व (वीस हजार रूपयांपर्यंत) इतक्या दंडाची शिक्षा होईल;
परंतु न्यायालयाच्या निकालपत्रात नमूद करावयाच्या तद्विरूद्ध विशेष व पुरेशा कारणांच्या अभावी, अशी कैदेची शिक्षा सहा महिन्यांपेक्षा कमी असात कामा नये व असा दंड (दहा हजार रूपयांपेक्षा) कमी असता कामा नये;
तीन) तिसऱ्या किंवा त्यानंतरच्या अपराधाबद्दल दोन वर्षांपर्यंत असू शकेल इतक्या मुदतीच्या कैदेची शिक्षा होईल व (वीस हजार रूपयांपर्यंत) असू शकेल इतक्या दंडाची शिक्षा होईल:
परंतु न्यायालयाच्या निकालपत्रात नमूद करावयाच्या तद्विरूद्ध विशेष व पुरेशा कारणांच्या अभावी, अशा कैदेची शिक्षा नऊ महिन्यांपेक्षा कमी असता कामा नये व असा दंड (दहा हजार रूपयांपेक्षा) कमी असता कामा नये.
*टिप :या वेबसाईट वरील कंटेंट किंवा माहिती ही केवळ शिक्षण किंवा ऐज्यूकेशनल वापरासाठी आहे, तरी याचा कुठेही कायदेशीर कारवाई करीता वापर करु नये तसेच या मध्ये काही चुका आढळल्यास त्यासाठी प्रकाशक किंवा वेबसाईट चे मालक जबाबदार असणार नाहीत, चुका निदर्शनास आणून दिल्यास सुधारण्याचा प्रयत्न केला जाईल.
No feedback yet
Form is loading...