महाराष्ट्र जमीन महसूल संहिता १९६६ कलम २ : व्याख्या :
महाराष्ट्र जमीन महसूल संहिता १९६६
कलम २ :
व्याख्या :
संदर्भानुसार दुसरा अर्थ अभिप्रेत नसेल तर, या संहितेत, -
१)कृषिवर्ष या संज्ञेचा अर्थ राज्य शासन राजपत्रातील अधिसूचनेद्वारे नेमील त्या दिनांकापासून सुरू होणारे वर्ष असा होतो ;
२)दुमाला या संज्ञेचा अर्थ खंड किंवा जमीन महसूल देण्याचे राज्य शासनाचे हक्क जेथवर संबंधित असतील तेथवर पूर्णत: किंवा अंशत: कोणत्याही व्यक्तीच्या मालकीत हस्तांतरित झालेली, असा होतो ;
३)सीमांची चिन्हे या संज्ञेचा अर्थ, उभी केलेली कोणताही निशाणी, मग ती मातीची असो, दगडाची असो किंवा इतर पदार्थाची असो आणि तसेच जमिनीच्या कोणत्याही भागाची सीमा नियोजित करण्याकरिता, त्याबाबत प्राधिकार असलेल्या भू-मापन अधिकाऱ्याने किंवा महसूल अधिकाऱ्याने उभारलेले, लावलेले किंवा निर्दिष्ट केलेले कोणतेही कुंपण, बिन-नांगरलेला बांध किंवा जमिनीची पट्टी किंवा अन्य, नैसर्गिक किंवा कृत्रिम वस्तु, असा होतो;
४)इमारत या संज्ञेचा अर्थ शेतातील इमारत नसलेले कोणतेही बांधकाम असा होतो;
५)इमारतीची जागा या संज्ञेचा अर्थ बांधकाम करण्याच्या प्रयोजनांकरिता धारण केलेला जमिनीचा भाग असा होतो - मग त्यावर प्रत्यक्षपणे कोणतीही इमारत उभारण्यात आली असो किंवा नसो, आणि त्यामध्ये, त्यावर उभारलेल्या कोणत्याही इमारतीने परिवेष्टित किंवा तिच्याशी संलगन असेलेली मोकळी जागा किंवा अंगण यांचा समावेश होतो;
६) १८७२ चा एक - प्रमाणित प्रत किंवा प्रमाणित उतारा या संज्ञेचा अर्थ, भारतीय पुरावा अधिनियम, १८७२ याच्या कलम ७६ अन्वये विहित केलेल्या रीतीने प्रमाणित केलेली, यथास्थिति, प्रत किंवा उतारा असा होतो;
७)चावडी या संज्ञेचा अर्थ, गावाचा कारभार चालविण्यासाठी ग्राम अधिकाऱ्याकडून सर्वसाधारणपणे वापरण्यात येणारी जागा असा होतो ;
१.(७क) आधारसामग्री संचयिका (डाटा बँक) म्हणजे संबंधित विभागाच्या जिल्हा प्रमुखाने निर्णायकतेने प्रमाणित केलेला आणि त्याने वेळोवेळी अद्ययावत करुन, संबंधित जिल्हाधिकारी कार्यालयात सुस्थितीत ठेवलेल्या माहितीचा संचयिका ंसग्रह होय, जो संहिते अन्वये अकृषिक प्रयोजनांसाठी जमिनीच्या वापराबद्दलची परवानगी देताना संबंधित विभागाच्या आक्षेपाची, कोणतेही असल्यास, विनिश्चिती करुन घेण्यासाठी जिल्हाधिकाऱ्याकडून वापरण्यात येईल;)
८)भू-संपत्ती या संज्ञेचा अर्थ, जमिनीतील कोणताही हितसंबंध आणि ती जमीन धारण करण्यास पात्र असलेल्या व्यक्तींकडे किंवा व्यक्तीसमुहांकडे निहित असलेले एकूण हितसंबंध असा होतो ;
९)शेतातील इमारत या संज्ञेचा अर्थ, आकारणी केलेल्या किंवा शेतीच्या कारणाकरिता धारण केलेल्या जमिनीवर, अशा जमिनींच्या किंवा तिच्या धारकाच्या मालकीच्या किंवा त्याच्याकडून लागवड करण्यात येत असलेल्या कोणत्याही इतर जमिनींच्या संबंधातील पुढीलपैकी सर्व किंवा कोणत्याही प्रयोजनासाठी -
क)शेतीची अवजारे, खत किंवा वैरण साठविण्यासाठी,
ख)शेतीचे उत्पन्न साठविण्यासाठी,
ग)गुराढोरांना निवारा मिळण्यासाठी,
घ)जमीन धारकाच्या कुटुंबातील व्यक्तींच्या, सेवकांच्या किंवा कुळाच्या निवासासाठी, किंवा
ड)लागवडीसंबंधीच्या त्याच्या व्यवस्थेचा एक अभिन्न भाग असलेल्या इतर कोणत्याही प्रयोजनासाठी बांधलेले बांधकाम असा होतो.
१०)गावठाण किंवा गावातील जागा या संज्ञेचा अर्थ, कलम १२२ अन्वये निश्चित करण्यात आल्याप्रमाणे गावाच्या, नगराच्या किंवा शहराच्या जागेमध्ये समाविष्ट असलेली जमीन असा होतो;
११)शासकीय पट्टेदार या संज्ञेचा अर्थ, कलम ३८ अन्वये तरतूद केल्याप्रमाणे शासनाकडून पट्टयाने जमीन धारण करणारी व्यक्ती असा होतो;
१२) जमीन धारण करणे किंवा जमीनधारक असणे किंवा जमिनीचा धारक असणे या संज्ञेचा अर्थ, वैधरीत्या जमिनीचा कब्जा असणे असा होतो -मग तो प्रत्यक्षात असो किंवा नसो ;
१३)धारण जमीन या संज्ञेचा अर्थ, धारकाने धारण केलेल्या जमिनीचा भाग असा होतो;
१४)धारण जमिनीच्या संबंधात सुधारणा या संज्ञेचा अर्थ, ज्यामुळे जमिनीच्या किंमतीत महत्त्वपूर्ण वाढ होते व जे अशा जमिनीवर करणे योग्य आहे. तसेच ज्या कारणाकरिता जमीन धारण करण्यात आली असेल त्या कारणाशी जे सुसंगत आहे आणि जे काम धारण जमिनीवर केले नसेल, तरीही ते तिच्या प्रत्यक्षपणे फायद्यासाठी केलेले असेल किंवा काम झाल्यावर त्या जमिनीस प्रत्यक्षपणे फायदेशीर करून देण्यास येत असेल असे कोणतेही काम, असा होतो; आणि पूर्ववर्ती तरतुदींना अधीन राहून यामध्ये, -
क)शेतीच्या प्रयोजनांसाठी पाण्याचा साठा, पुरवठा किंवा वाटप करण्यासाठी तलाव, विहिरी, पाण्याचे पाट, बंधारे व इतर बांधकामे बांधणे;
ख)जमिनीवरील जलनिस्सारणासाठी किंवा पुरामुळे किंवा धूप होण्यामुळे किंवा पाण्यामुळे होणाऱ्या इतर नुकसानीपासून जमिनीचे संरक्षण करण्यासाठी बांधकामे करणे;
ग)झाडे लावणे आणि जमीन लागवडयोग्य करणे, साफ करणे, जमिनीला कुंपण घालणे, ती सपाट करणे किंवा ताली बांधणे;
घ) धारण जमिनींचा सोयीस्कररीत्या किंवा फायदेशीर उपयोग करण्यासाठी किंवा तिचा भोगवटा करण्यासाठी अशा धारण जमिनीवर किंवा तिच्या परिसरात गावठाणव्यतिरिक्त इतरत्र इमारती बांधणे ; आणि
ड)वरीलपैकी कोणतेही बांधकाम पुन्हा नव्याने बांधणे किंवा त्याची पुन्हा बांधणी करणे किंवा त्यामध्ये फेरफार किंवा वाढ करणे. या गोष्टींचा समावेश होतो;
मात्र, त्यामध्ये पुढील गोष्टींचा समावेश होत नाही -
(एक) त्या ठिकाणच्या शेतकऱ्यांकडून शेतीच्या नित्य व्यवसायात सामान्यत: करण्यात येणारी पुढील कामे म्हणजे, तात्पुरत्या विहिरी आणि पाण्याचे पाट व बंधारे बांधणे, जमीन सपाट करणे, कुंपण घालणे किंवा अन्य कामे करणे किंवा अशा प्रकाराच्या कामात किरकोळ फेरबदल करणे किंवा दुरूस्ती करणे; किंवा
(दोन) भोगवटादार किंवा कुळ म्हणून कोणत्याही इतर व्यक्तीच्या कब्जात कोठेही असलेल्या कोणत्याही जमिनीची किंमत वस्तुत: कमी करणारे कोणतेही काम;
स्पष्टीकरण :
जे काम , अनेक धारण जमिनींना फायदेशीर होते ते अशा धारण जमिनीपैकी प्रत्येक धारण जमिनीच्या बाबतीत केलेली सुधारणा आहे असे समजण्यात येईल.
१५)संयुक्त धारक किंवा संयुक्त भोगवटादार या संज्ञेचा अर्थ, जमिनीचे सहहिस्सेदार म्हणून ती धारण करणारे धारक किंवा भोगवटादार असा होतो. मग ते हिंदू कायद्यानुसार अविभक्त कुटुंबातील सहहिस्सेदार असोत किंवा अन्य रितीने असोत, आणि ज्यांच्या हिश्यांची मोजून-मापून विभागणी करण्यात आली नाही असे धारक किंवा भोगवटादार; आणि जेव्हा जमीन संयुक्त धारकांनी किंवा संयुक्त भोगवटादारांनी धारण केली असेल तेव्हा, यथास्थिती, धारक किंवा भोगवटादार याचा अर्थ सर्व संयुक्त धारक किंवा संयुक्त भोगवटादार असा होतो;
१६)जमीन या संज्ञेत, जमिनीपासून मिळावयाच्या फायद्याचा आणि भूमीस संलग्न असलेल्या वस्तूंचा किंवा भूमीस संलग्न असलेल्या वस्तूंशी कायम जोडलेल्या कोणत्याही वस्तूंचा, आणि तसेच, गावाच्या किंवा निश्चित केलेल्या इतर प्रदेशांच्या महसुलातील किंवा खंडातील हिस्सा किंवा त्यावरील आकार, यांचा समावेश होतो ;
१७)जमीन मालक या संज्ञेचा अर्थ, जमीन पट्टयाने देणारा असा होतो;
१८)भूमि- अभिलेख या संज्ञेचा अर्थ, या संहितेच्या तरतुदींअन्वये, किंवा त्याच्या प्रयोजनांकरिता ठेवलेले अभिलेख असा होतो आणि त्या संज्ञेत राज्यांत अंमलात असलेल्या कोणत्याही कायद्यान्वये कोणत्याही क्षेत्रात अंमलात आलेल्या आणि अशा कायद्यान्वये किंवा अन्यथा कोणत्याही महसूल किंवा भू-मापन अधिकाऱ्यांकडे पाठविण्यात आलेल्या अंतिम नगरचना योजनेचे, सुधारणा योजनेचे किंवा धारण जमिनीच्या एकत्रीकरणाच्या योजनेचे नकाशे व आराखडे यांच्या प्रतीचा समावेश होतो;
१९)जमीन महसूल या संज्ञेचा अर्थ, कोणत्याही व्यक्तीने धारण केलेल्या किंवा तिच्याकडे निहित असलेल्या जमिनीबद्दल किंवा तीत असलेल्या हितसंबंधाबद्दल किंवा त्यावर चालवता येण्याजोग्या हक्कबद्दल तिच्याकडून राज्य शासनाला किंवा राज्य शासनाच्या वतीने मिळालेल्या किंवा वैधरित्या मागमी करण्याजोग्या पैशाच्या स्वरूपातील सर्व रकमा किंवा द्यावयाच्या रकमा- मग अशा रकमा कोणत्याही नावाखाली देण्याजोग्या असोत- आणि राज्य शासनाने त्या त्या वेळी अंमलात असलेल्या कोणत्याही कायद्याच्या तरतुदींअन्वये अधिकृत केलेला कोणताही उपकर किंवा पट्टी असा होतो आणि त्यात कोणत्याही जमिनीबद्दल अधिकृत केलेला कोणताही उपकर किंवा पट्टी असा होतो आणि त्यात कोणत्याही जमिनीबद्दल इनामदाराकडून देण्याजोगे कोणतेही पट्टामूल्य (प्रिमियम ), खंड, पट्टयाची रक्कम उक्ता खंड (क्विटरेंट ), जुडी किंवा कोणत्याही अधिनियमान्वये, नियमान्वये, करारान्वये किंवा लेख्यांन्वये तरतूद केल्याप्रमाणे द्यावयाची इतर कोणतीही रक्कम यांचा समावेश होतो;
२०) १९६१ चा २५ - विधि व्यवसायी या संज्ञेचा अर्थ, अधिवक्त्यांबाबत अधिनियम, १९६१ यात जो दिलेला असेल तोच असेल
२१) अकृषिक आकारणी या संज्ञेचा अर्थ, अकृषिक प्रयोजनांसाठी केलेल्या जमिनीच्या उपयोगाच्या संदर्भात, या संहितेच्या तरतुदींअन्वये किंवा तद्न्वये केलेल्या नियमांन्वये कोणत्याही जमिनीवर निश्चित केलेली आकारणी असा होतो;
२२) भोगवटयाची जमीन या संज्ञेचा अर्थ, भोगवटादाराने धारण केलेल्या जमिनीचा भाग असा होतो;
२३)भोगवटादार या संज्ञेचा अर्थ, कूळ किंवा शासकीय पट्टेदार खेरीजकरून, बिनदुमाला जमिनीचा प्रत्यक्ष कब्जा असलेला धारक असा होतो; परंतु प्रत्यक्ष कब्जा असणारा धारक हा कूळ असेल त्याबाबतीत, भूमिधारक किंवा, यथास्थिती, वरिष्ठ जमीनमालक हा भोगवटादार आहे असे मानण्यात येईल;
२४)भोगवटा या संज्ञेचा अर्थ, कब्जा असा होतो;
२५)जमिनीचा भोगवटा करणे या संज्ञेचा अर्थ, जमीन कब्जात असणे किंवा कब्जात घेणे असा होतो;
२६)पार्डी जमीन या संज्ञेचा अर्थ, गावठाणातील घरांशी संबंधित असलेली लागवड केलेली जमीन असा होतो;
२७)कोणत्याही क्षेत्राच्या संबंधात लोकसंख्या या संज्ञेचा अर्थ, ज्या जनगणनेची संबंधित आकडेवारी प्रसिध्द करण्यात आली आहे अशा निकटपूर्वीच्या जनगणनेत ठरविलेली लोकसंख्या असा होतो;
२८)विहित या संज्ञेचा अर्थ, राज्य शासनाने या संहितेअन्वये केलेल्या नियमांद्वारे विहित केलेले असा होतो;
२९)मान्यताप्राप्त अभिकर्ता या संज्ञेचा अर्थ, या संहितेअन्वये कार्यवाहीतील कोणत्याही पक्षकाराने अशा कार्यवाहीमध्ये , त्याच्या वतीने उपस्थित राहण्यासाठी व अर्ज करण्यासाठी आणि इतर कामे करण्यासाठी लेखी प्राधिकृत केलेली व्यक्ती असा होतो;
३०) संबंधित कुळवहिवाट कायदा या संज्ञेचा अर्थ, -
क)महाराष्ट्र राज्याच्या मुंबई क्षेत्राच्या संबंधात, २.(मुंबई कुळवहिवाट व शेतजमीन अधिनियम), १९४८ (१९४८ चा मुंबंई ६७).
ख)महाराष्ट्र राज्याच्या हैदराबाद क्षेत्राच्या संबंधात, ३.(हैदराबाद कुळवहिवाट वे शेतजमीन अधिनियम), १९५० (१९५० चा हैदराबाद २१)); आणि
ग)महाराष्ट्र राज्याच्या विदर्भ प्रदेशाच्या संबंधात, मुंबई कुळवहिवाट व शेतजमीन (विदर्भ प्रदेश ) अधिनियम, १९५८(१९५८ चा मुंबई ९९) असा होतो;
३१)महसूल अधिकारी या संज्ञेचा अर्थ, या संहितेच्या कोणत्याही तरतुदींअन्वये नेमलेला आणि जमीन महसुलाच्या किंवा भूमापनाच्या, आकारणीच्या, हिशोबाच्या किंवा तत्संबंधी अभिलेखाच्या कामकाजात किंवा कामकाजांच्या संबंधाने नियुक्त केलेला कोणत्याही दर्जाचा प्रत्येक अधिकारी असा होतो ;
३२)लोकसंख्या या संज्ञेचा अर्थ, राज्य शासन, राजपत्रातील अधिसूचनेद्वारे जो दिनांक नेमील अशा दिनांकापासून सुरू होणारे वर्ष असा होतो ;
३३)साझा या संज्ञेचा अर्थ, कलम ४ अन्वये साझा म्हणून रचना करण्यात आलेल्या तालूक्यातील गावांचा गट असा होतो;
१.(३३क) साठवणुकीचे यंत्र याचा अर्थ, संगणकामध्ये माहिती साठवून ठेवण्यासाठी वापरण्यात येणारे इलेक्टड्ढॉनिक्स / विद्युत यंत्र, असा आहे. आणि यात, यंत्रसामग्री व आज्ञावली (हार्डवेअर व सॉफ्टवेअर ) या दोन्हींचा समावेश होतो.);
३४)उपविभागीय अधिकारी या संज्ञेचा अर्थ, जिल्ह्याच्या एका किंवा अनेक उप-विभागांचा कार्यभार ज्याच्याकडे सोपविण्यात आला आहे असा सहायक किंवा उप-जिल्हाधिकारी असा होतो;
३५)भू-मापन क्रमांकाचा पोट-विभाग या संज्ञेचा अर्थ, भू-मापन क्रमांकाच्या ज्या विभागाचे क्षेत्रफळ आणि आकारणी, भूमि-अभिलेखांत ज्या भू-मापन क्रमांकाचा तो भाग असेल त्या क्रमांकानंतर दर्शक क्रमांक देऊन स्वतंत्रपणे नोंदली असेल तो भाग असा होतो ;
३६)भू-मापन निशाणी या संज्ञेचा अर्थ, या संहितेच्या प्रयोजनांसाठी भू-करासंबंधी (कॅडॅस्टड्ढल ) भू-मापनाच्या प्रयोजनांसाठी उभारण्यात आलेली निशाणी असा होतो;
३७)भू-मापन क्रमांक या संज्ञेचा अर्थ, भूमि-अभिलेखात दर्शक क्रमांक देऊन त्याखाली जमिनीच्या ज्या विभागाचे क्षेत्रफळ आणि आकारणी स्वतंत्रपणे नोंदण्यात आली असेल तो जमिनीचा भाग असा होतो आणि, त्यामध्ये -
(एक) कोणत्याही कायद्यान्वये कोणत्याही क्षेत्रात अंमलात आलेली अंतिम नगररचना योजना, सुधारणा योजना किंवा धारण जमिनीच्या एकत्रीकरणाची योजना यान्वये पुर्न:प्रस्थापित भू-खंडाचा (प्लॉटस् ); आणि
(दोन) नागपूर, वर्धा, चांदा व भंडारा या जिल्हयांतील खसरा क्रमांक म्हणून ओळखण्यात येणाऱ्या कोणत्याही दर्शक क्रमांकाखाली भूमि-अभिलेखात नमूद केलेल्या जमिनीच्या कोणत्याही भागाचा समावेश होतो ;
३८ )प्रकरण १४ खेरीज, वरिष्ठ धारक या संज्ञेचा अर्थ, इतर भूमिधारकांकडून (ज्यांना कनिष्ठ धारक असे म्हटले आहे ) खंड किंवा जमीन महसूल घेण्याचा हक्क ज्या भूमिधारकास आहे तो भूमिधारक असा होतो; मग तो अशा खंडाबद्दल किंवा जमीन महसुलाबद्दल, किंवा त्यांच्या कोणत्याही भागाबद्दल राज्य शासनाला जबाबदार असो किंवा नसो :
परंतु, दुमाला जमिनीचा धारक म्हणून भूमि-अभिलेखात अधिकृतरित्या नोंदण्यात आलेल्या धारकाने, विवक्षित अशा विशिष्ट, परिस्थितीत, जमीन पुन्हा परत घेतली जाण्याच्या हक्कास अधीन राहून, खंडाच्या किंवा जमीन महसूलाच्या माफीसह जमीन दिलेली असेल तेव्हा, असा धारक, ज्याला ती जमीन दिली असेल त्याच्या बाबीतीत, त्याने अशा रितीने दिलेल्या जमिनीचा वरिष्ठ धारक आहे असे मानण्यात येईल, आणि ज्याला जमीन देण्यात आली असेल तो, ज्याने जमीन दिली त्यांच्या बाबतीत अशा जमिनीचा कनिष्ठ धारक आहे असे मानण्यात येईल. आणि महाराष्ट्र जिल्हा परिषद व पंचायत समिती अधिनियम, १९६१ (१९६२ चा महा .५), याची कलमे १४७, १५१ आणि १५२ च्या प्रयोजनांसाठी, यापुढे कूळ या संज्ञेच्या व्याख्येत काहीही अंतर्भूत केलेले असले तरीही, तो अशा जमीन देणाऱ्या व्यक्तीचे कूळ आहे असे मानण्यात येईल.
३९)भू-मापन अधिकारी या संज्ञेचा अर्थ, कलम ८ अन्वये, किंवा त्यामध्ये तरतूद केलेल्या रीतीने नेमलेला अधिकारी असा होतो ;
४०)कूळ या संज्ञेचा अर्थ, पट्टेदार असा होतो -मग तो लेखान्वये जमीन धारण करणारा असो, किंवा तोंडी करारान्वये जमीन धारण करणारा असो - आणि त्यामध्ये, कब्जासहित कुळाचे हक्क गहाण घेणाऱ्या व्यक्तीचा समावेश होतो; परंतु त्यामध्ये प्रत्यक्षपणे राज्य शासनाकडून जमीन धारक करणाऱ्या पट्टेदाराचा समावेश होत नाही.
४१)भोगवटयात नसलेली जमीन या संज्ञेचा अर्थ, भोगवटादार, कूळ किंवा शासकीय पट्टेदार यांनी धारण केलेल्या जमिनीखेरीज गावातील जमीन असा होतो;
१.(४२) नागरी क्षेत्र याचा अर्थ त्या त्या वेळी अंमलात असलेल्या कोणत्याही कायद्यान्वये घटित करण्यात आलेल्या कोणत्याही महानगरपालिकेच्या किंवा नगरपालिकेच्या हद्दीत समाविष्ट केलेले क्षेत्र असा आहे आणि नगरेतर क्षेत्र या शब्दप्रयोगाचा अर्थ त्यानुसार लावला जाईल. )
४३)गाव या संज्ञेत, नगराचा किंवा शहराचा आणि गावाच्या, नगराच्या किंवा शहाराच्या सर्व जमिनींचा समावेश होतो ;
४४)वाडा जमीन या संज्ञेचा अर्थ, गुरे-ढोरे बांधण्यासाठी किंवा पीक किंवा वैराण, खत किंवा तत्सम इतर वस्तू साठविण्यासाठी वापरलेली गावठाणातील खुली जागा असा होतो.
-------------
१. सन २०१४ चा महाराष्ट्र अधिनियम क्रमांक ३७ याच्या कलम २ द्वारा समाविष्ट करण्यात आले.
२. सन २०१२ चा महाराष्ट्र अधिनियम क्रमांक २४ याच्या कलम २ आणि ३, अनुसूची द्वारे महाराष्ट्र कुळवहिवाट व शेतजमीन अधिनियम अशी सुधारणा करण्यात आली.
३. सन २०१२ चा महाराष्ट्र अधिनियम क्रमांक २४ याच्या कलम २ आणि ३, अनुसूची द्वारे महाराष्ट्र कुळवहिवाट व शेतजमीन (विधर्भ विभाग) अधिनियम अशी सुधारणा करण्यात आली.
४. सन २००५ चा महाराष्ट्र अधिनियम क्रमांक ४३ याच्या कलम २ द्वारे खंड (३३क) दाखल करण्यात आला.
५. सन २००३ चा महाराष्ट्र अधिनियम क्रमांक २१, कलम २ द्वारे खंड ४२, ऐवजी हा खंड दाखल करण्यात आला.
#MaharashtraLandRevenueCode1966Marathi #महाराष्ट्रजमीनमहसूलसंहिता१९६६कलम२
#MLRCAct1966Marathisection2 #section2MLRCAct1966Marathi
*टिप :या वेबसाईट वरील कंटेंट किंवा माहिती ही केवळ शिक्षण किंवा ऐज्यूकेशनल वापरासाठी आहे, तरी याचा कुठेही कायदेशीर कारवाई करीता वापर करु नये तसेच या मध्ये काही चुका आढळल्यास त्यासाठी प्रकाशक किंवा वेबसाईट चे मालक जबाबदार असणार नाहीत, चुका निदर्शनास आणून दिल्यास सुधारण्याचा प्रयत्न केला जाईल.
No feedback yet
Form is loading...